Angh PB Acharya-i tetsü oshi jembitsü ayongzüker

Kohima, May 23 (TYO): Nagaland Angh, PB Acharya-i tanü, primary education nung tetsü oshi adentsüla, kechiyong tila asüdang tanurtemi oshioben melamela angazüker, ta ashi.
Ura Academy Badi, Kohima nung 47 buba annual Tenyidie seminar tenzükba sentong nung o jembidang, Acharya-i, “sobaliba aser shisaliok nung oshiji tiyongtsü lir aser nisung ka maitsü atema mezüngbuba aser tongtipangtibaji tetsü oshi lir” ta ashi.
“Pei oshi toktsür Hindi, English amala tangar oshi ka agizükba nung lendong tulu keta lir. English oshi dak kanga temulung agütsüba ajanga asen oshi aika samaa aotsü jenjang nung lir” ta paisa shisem.
“Tetsü oshiji tashi ka lir aser Naga nungertemi pei tetsü oshitem jembitsüla. Naga nungertemi Nagaland tashitait kümdaktsütsüla” ta Angh-isa ayongzük.
Nagaland sorkari Naga oshitem wazüktsü, kümzüktsü aser ajungkettsü atema oshi asem shimba atema PB Acharya-i tenüngsang agütsü aser paisa Professor Ura Academy, Dr D Kuolie-i züluba kaket ana sayatsü.
Sentong nung social activist, Niketu Iralu-ia o jembidang, India sorkar aser NSCN-IM tsüngda Naga yimten tebilemtsü atema jembia aruba indang metetdaktsü.
“Naga nungerji India nunger anemer masü, linük anemer masü aser tongtipangsa Naga nungerji linük toktsür razüka onürtem masü” ta Iralu-isa shisem.
Naga nungeri küm aika India sorkar, army aser telok balala den olemtepyonga arur. Kümtem süia arudang meshitak mapatem inyaksemogo aser ibaji ajaki hau ta agizüker. Naga nungeri India nunger den oa ajuruteptsüla aser parnoki asennok asoshi raratsütsü, ta paisa ayongzük.
Ura Academy den tanga Naga nunger teloktemi India nunger den ajurutepa sensaksemtsüla. Iba asoshi Naga nungertemi külem Naga nunger den ajuruteptsüla aser tebilembatem lemsateptsüla aser tangari ashiba-a angatsüla, ta Iralu-isa ashi.
Naga nunger ya India aser China tsüngda lir aser linük ana-ji alima nung civilization tejentiba aser tajungtiba rongnung dena lir. Ochi nem takok ngudakjang, temeten ayimokjang aser agizükang. Aibelenji sangdongang aser agizükang. Asenoki shidak inyakra, tatem nung shidak ataloktsü, ta paisa ashi.
Iba sentong nung mendenji Vipralhou Kesiezie liasü, Chief Minister aser Ura Academy tir, Dr Shürhozelie Liezietsu-ia Ura Academy indang osang tatsü agi metetdaktsütsü aser Tenyimi People’s Organisation (TPO) tir, Timikha Koza-ia o jembi.