Churachandpur nung anogo 632 sülen mang 8 remogo

Imphal, May 24 (Agencies): 2015 küm Manipur kübok Churachandpur district nung ILP Bill asem anema lungkak aitdang nisung 9 tepsetba nungi parnok mang ti Bodbarnü remogo.
Tanü Hiangtam Lamka Public Ground nung nisung meyirjang aika adenshia, tasür nem tetushi agütsüba sentong ka agi aser iba sülen Mata Khuga Dam, Lamka, Churachandpur nung aliba Memorial Ground nung mang 8 ji arem.
Iba sentong nung Manipur sorkar nung Minister tem- Thongam Biswajit, Nemcha Kipgen, Losii Dikho, V Hangkhanlian aser Chief Secretary Oinam Nabakishore nungertem aden.
Manipur nung tang aliba sorkari tesüiba mapang aibelenbatem ajak angatettepba atema kanga pelar. Nübortem aser sorkar külemi inyakba ajanga tanü tasür nem akhüm tetushi agüja mang aremer, ta Minister Biswajit-i tanü o jembidang ashi.
Minister V Hangkhalian-ia tasürtem nem tetushi agütsü aser 2015 küm lungkak aitdang yiruyibongertem asoshi aria bilemtsüba osang metetdaktsü.
Lanurtemi parnok taküm tenla agütsüba ajanga lisopurtemi longjemdaktsüogo aser ibaji ajanga tarutsü tajung ka yangertettsü, ta paisa ashi.
V Hangkhalian-isa, JAC, DC Churachandpur R Sudhan, SP Rakesh Balwal, 27th Sector Brigadier Ajay Kumar aser 25 Bn Commandant nunger dang iba sentong takok ngua agitettsü yaritepba atema pelaba metetdaktsü.
Manipur assembly nung ILP indang bill asem agizükba anema September 2015 nung lungkak aitdang nisung 9 tepset. Tasürtem rongnung kabo taoba mapang kinungertemi remogo.