Lord of Rocks-i Mkg nung concert agutsütsü yongyar

Lord of Rocks band züngsemtem den achayanger aser tayongertem külemi tangokba noksa nung angur.

Mokokchung, May 25 (TYO): May 27 Honibar aonung 6:00 ako nungi tenzüka Mokokchung town hall nung ‘Lords of Rocks (LOR)’ ta sür classic rock jangrar telok kati concert agütsütsü asoshi mazüngi ken bushitepdar.
Iba aonung LOR teloki 1980’s rock n’ Roll music nungi ken balala atentsü terenemba lir. Iba aonungji parnoki atenba ken kar den ano Mr. Big, Metallica, Skid Row, Bon Jovi, Guns & Roses, Extreme, Fire House aser ano nüburtemi sapuba kensep balala nungi atentsü, ta osang angazüker.
Mokokchung ama rock music meimba yimti ka nung concert agütsütsü onoki kanga yongyar aser mapang talang nungi onok terenemba tulu lir, ta LOR nung ken atensang, Clemant Imsong-i osangbener senden ka The Restaurant Mokokchung nung alidang ashi. Nagaland nung Rock music indang jembidang, Mokokchung ya mezüngpurtem, iba yimti nungi Squadron ama rock band tajung aika adokba den rock n roll tsütsü kanga nüngtugu yimti ka lir, anungji nüburtemi iba kenten sentong nung arua shilem agitsü onok teimla tulu lir, ta paisa ashi.
Iba yimti nungi tenzüka Nagaland den India lima tesem balala nung kenten sentongtem ayonga jajatsü onok tebilemba lir, ta paisa ashi. Tarutsü nung onok jurila kensep-a adoktsü tejangraba lir, ta paisa shisem.
Iba telok nung ken atener aser kongki atemertemji; Clement Imsong (vocal), Akihito (Bassist), Alem Ozzy (drummer), Toshimoa (Guitarist) aser Aküm Jams (Guitarist) nungertem lir. Par telok ya Rockstar EI Pvt. Ltd-i anepalua achaayanger. Parnok ya taoba mapang band balala nung shilem agir takutet musician-tem dang lir. Par telok nung Band Manager-ji Poland nungi Mike Miruki lir.
Honibar aonungji Mokokchung nungi local band ‘Mannequin’ aser ‘Rag Dolls’ natia shilem agitsü, ta angazüker. Mokokchung nung alir aikati 80’s rock music memeimerbo malitsü südi, anungji, iba aonungji tangu sadoka orr reprangang, iba kenten sentongji ghonda ana shi dang asütsü.
Tejangrartemi Mokokchung Cosmos Hall aser Aria dokan nungi ticket alitsü akok aser ticket jenjangji senpak 300/- dang asütsü. Mokokchung nung iba kenten sentong ya ‘Temulunger Telok’ den yaritepa ayonger.