Mkg nung “World Environment Day” sentong tulu ayongzüka amungtsü

Mokokchung, May 25 (TYO): June 5, 2017 nü “World Environment” sentong tulu ka Mokokchung town hall nung ayongzüka amungtsü lir, ta District Forest Officer, Mokokchung Wb. T.N Jamiri sangdong ka ajanga metetdaktsüogo.
Iba sentong ya Nagaland Environment Forests & Climate Change Minister Wb. Imkong L Imchen lenisüba nung Nagaland Legislative Assembly Speaker Dr. Imtiwabang Aier tongti tesemdanger ka ama arua shilem agitsü, ta osang ajangasa metetdaktsü.
Iba sentong nung Aor yimtsüng ajak nungi council züngsem, VDB züngsem, Mokokchung district kübok head of the department ajak, Ao Senden, Watsü Mungdang, Ao Kaketshir Mungdang (AKM), Mokokchung Town Lanur Telungjem (MTLT), Fazl Ali College aser nija college-tem, All Ward Union Mokokchung Town, Adhoc town committee – Tuli/Mangkolemba/Changtongya aser Aor lokti tentet ajak nungi teshimtet nübu arua adentsü asoshi Mokokchung DFO-isa ayongzüka metetdaktsü.
Kasa sentong nung; alima tzü mopung melenshiba (Climate Change), arem shiruru koda wazüka aser kümzüka ayutsü (Wild life conservation), Village Council-i alima tzü mopung aser arem wazüka ayuba nung agitsü shilem, tekong lu (jhumming) koda tajangzük keta ayimtsü, ta asüba onüktem nung shisalen sayurtem jaoka shisatokden ka akatsü, ta osang angazüker.