Nagaland nung kibong 88.6% nung metsümeshidak junga yanglua lir

Kohima, May 25, 2017: Brihostibarnü Kohima nung sorkar, corporate aser nübortem tsüngda  longjemer linük merükmejutsü atema inyaktsü shisalemsatepba senden amenba noksa nung angur. 

Kohima, May 25 (TYO): Tang tashi nung Nagaland nung kibong 88.6 % nung metsümeshidak junga yanglua lir saka item ama merükmejuba mapaji yimya sübaa kibur küma inyaktsü aser nisung shinga tesem mashimashi nung metsümeshi masütsü asoshi tangatetba agütsütsü ano kanga nüngdaka lir, ta tanü PHE department nung ketdangsertemi metetdaktsüogo.
PHE Department osang ajanga ashiba agi, tang tashi nung parnoki Nagaland nung district trok kübok yimtsüng 302 tashi tonga oagi reprangdangogo aser item yimtsüngtem nungji putu mendeni ashiba ama kibong shia nung metsümeshidak junga yanglua liasü. Item district trokji Dimapur, Kiphire, Longleng, Phek, Zunheboto aser Mokokchung liasü. Item district-tem nung ya June ita tatem tashi nung shinga tesem mashimashi nung metsümeshi masütsüsa ajak kidang metsümeshidak yanglutsü nükjidong yua lir.
Iba onük ya tanü Brehostibar nü government, corporate aser nübortem rongnung tangatettep aser telongjem ka nung külem ser linük merükmejutsü indang jembiba ya nübortemi ajungai jangrabangraa inyakba mapa ka kümdaktsütsü asoshi anogo ka monga Civil Secretariat, Kohima nung shisalematepba sentong nung jembidang metetdaktsü.
Iba sentong ya Nagaland government kübok Public Health Engineering Department den longjemer North East Initiative Development Agency (NEIDA), Tata Trusts ajanga inyakba, aser Federation of India Chamber of Commerce & Industry (FICCI), ibai India nungbo Chamber tulutiba nungertem longjemer ayongzükba liasü.
Iba sentong lapokja jembidang, Deputy Director General, Union Ministry of Drinking Water & Sanitation, Hiranya Borah-i Nagaland nung nübortemi metsümeshidak tajungba yanglua amshitsübaji tongtibang kümogo, kechiyong iba jagi nisungtem anema lidaktsütsü.
Nagaland ya India nung tanga state-tem den apitep nungbo temerük state ka lir, anungji tangar dang tama taküm küm October ita tashi nungbo Nagaland nung kibong ajak nung metsümeshidak yanglua amshitettsü imlar ta paisa ashi.
Tang ya balaka linük nung merükmejutsü indang jembiba agi, company aser corporation aikati nübortem asoshi pei rongsen nung shilem ka agiteta linük nung metsümeshidak yangluba maparen nung yaridagi aser item teyari angurtem rongnung Nagaland ya ka lir ta paisa ashi.
Iba kasa sentong nung Secretary, PHED Nagaland, Maongwati Aier, Associate Director, Tata Trusts, Biswanath Sinha; Thematic Lead, Tata Water Mission, Divyang Waghela; Commissioner & Secretary, IT Department, K D Vizo; WSSO, PHED K Ghushito; Secretary, ECS-GB member NEIDA, Dr. Chingmak Kejong; State Coordinator, SBM, Govt. of Assam, Pratul Choudhury; PHED, Govt. of Mizoram, Lalrothanga; Health Officer, Assam, Dr. Sridhar Ryavanki; OSD, SDMA, Nagaland, Johnny Asin; NHM, Nagaland, Dr. Vizovotuo Lohe aser AGM, RO -Dimapur, SBI, Thongboi Lunkim nungertemi jembia liasü.
Iba sentong nung lenir 150 shi adenshia Nagaland nung Swacch Bharat Mission takok ngua inyaktsü asoshi shisalemsatepa liasü. Iba senden nung ya Nagaland, Assam aser Mizoram state-tem nungi arua dena liasü.
Tata Water Mission / Nagaland & Mizoram (SBM) ajanga yimtsüng 400 nung kibong 40,000 repranger. Itemji Dimapur, Kiphire, Phek, Zunheboto, Mokokchung, Longleng aser Tuensang distict-tem nung lir.