IAF indang samaba tayimtsü nguogo

New Delhi, May 26 (Agencies): Anogo asem tejaklen Indian Air Force (IAF) indang raraba tayimtsü ka samaa liasü, aser tanü iba tayimtsü teraksa ngutetogo, ta osang ka ajanga ashi.
IAF ketdangser kati sangdong ka ajanga, “Tayimtsü teraksa nguogo. Tayimtsü teraksaji tesüsa osang agitepba tesem nung nguogo. Tang tsüngsang majung aser mepettzüsü lir. Maneni osang metetdaktsütsü,” ta metetdaktsü.
Iba tayimtsü nungji pilot ana mena liasü aser iba lendong nung tena taküm mekümzük südi ta bilemer.
May 23, 2017 nü iba tayimtsü den osang magiteptetba sülen nungi tenzüka iba tayimtsü bushia liasü. Ajisüaka tsüngsang majungba ajanga iba maparen nung takok mengui aruogo.
IAF sepaitem telok pezü, Indian Army telok teku aser state ketdangser telok anati tesem balala nung iba tayimtsü bushia liasü.
Tezpur Air Base nungi apusoba sülen Tezpur nungi kilometer 60 pilar tayimtsü indang radar aser radio tongtepratep makai aküm.