EVM hackathon nung shilem magitsü: AAP

New Delhi, May 26 (Agencies): June 3, 2017 nü Election Commission (EC)-i ayongba EVM hackathon ya tamasa ka lir, ta aija tanü Aam Aadmi Party (AAP)-i, party-i iba sentong nung shilem magitsü, ta metetdaktsü.
AAP-isa, kechiba EC-i ayongba- EVM raksatsü jazükba sentong nung tenokdangba kar benoker?, ta asüngdang.
“Iba ya EVM hackathon ka masü. Kechiba onoki iba tamasa nung shilem agitsü. Tang telatetba nung ajemdakerbo party-i EVM tayongzükba nung shilem magitsü,” ta tanü Aam Aadmi Party Delhi Convenor, Gopal Rai-i ashi.
AAP-i Election Commission dang Electronic Voting Machine (EVM) hackathon nung EVM motherboard amshitsü temelaba agüjang, ta mepishia liasü, ajisüaka EC-i ibaji magizükba sülen tanü AAP-i iba tayongzükba nung shilem magitsü telemtetba agiogo.
EVM raksaa amshitsü tayongzükba nung shilem agitsü atema tenüng agütsütsü asoshi yimtenren party tem nem Hokolbarnü tashi anogo agüja liasü.
“Tanüa onoki shidi ajanga Election Commission dang open hackathon asütsü mepishia liasü,” ta Rai-i Delhi nung osangbenertem dang ashi.
“Election Commission-i nangzüka aliba nungi atsüngshia kechiba telatetbatem agütsür? Election inyakyim kümzüka ayutsüsa kechiba EC-i open hackathon mayongzüker?” ta paisa asüngdang.
Pai ashiba agi, hackathon nung temzüng ozüng mali, kechiyong security oset kechi südir süaka raksaa amshitsü atema oset mashie amshir.
Ano AAP lenir, Dilip Pandey-ia, techinal mongin aikatia shidi ajanga Chief Election Commissioner, Nasim Zaidi dang iba tayongzükba ya ‘open hackathon’ ka asütsü atema mepishiogo, ta metetdaktsü.