Mark-i Harvard doktsür küm 13 sülen Honorary Degree agizük

Massachusetts, May 26 (Agencies): Mark Zuckerberg-i Harvard University doktsür küm 13 sülen tanaben arua honorary degree agizükogo. Ivy League school-i pa tanaben arua graduate asürtem den o jembi.
Facebook indang CEO-i kaketshir den jembi tenzükdang, “Ni metongtetba mapa ka nünoki tongtetog,” ta ashi.
Harvard College nung Zuckerberg ya 2002 küm tenüng züluok aser küm ana lir pai degree monguteti iba kaket reju doktsü. Tang arishi küm 33 tain, Zuckerberg-i social media sapang ya ‘Thefacebook’ tenüng nung 2004 küm Harvard nungi saya aser iba mapang Priscilla Chang ya ajuru.
Harvard dorm room nungi pai minute 24 indang video ka yanglu aser pelashishia sentepa alirtem den jembi.
Par tsüraburtem-a arua pa den yariteba pa indang osettem bener ao aser par medemertemi tatembang benjung ka ayungzük.
Zuckerberg-i Facebook ya pa indang drom room nungi 2004 küm tenzük. Iba sapang ya mezüng bo Harvard nung azüngertemi dang amshia tenzük saka tang bo iba sapang amshir billion 2 ajungtsü mapang ka lir.
Küm ter shi süyiogo, Bill Gates-a kasa Harvard nungi degree monguteti anenadok. Apple indang co-founder, Steve Jobs ya Oregon nung aliba Reed College nungi degree monguteti küm tum nung college doktsü.