Airtel, Idea aser Vodafone nem TRAI-i temerenshi agütsüba ya sorkari reprangdangtsü: Manoj Sinha

New Delhi, May 26 (Agencies): Reliance Jio nem Points of Interconnection (PoI) shidak magütsüba atema Telecom Regulatory Authority of India (TRAI) ajanga temerenshi senchi achitsü ‘proposal’ agütsüba ya sorkari mapang shidak nung reprangshitsü.
New Delhi nung osangbener den senden ka amenba mapang TRAI-i temerenshi agütsüba nung sorkar koba nung nokdaka lir, ta asüngdangdang, “Proposal ya arudakjang aser onoki reprangdangtsü. Mapang shidak nung onoki lemtettsü,” ta Communication Minister, Manoj Sinha-i ashi.
Telecom operator asem, Bharti Airtel, Vodafone aser Idea dang TRAI-i senchi sen crore 3,050 achi.
TRAI-i iba shidi ya telecom department nem Bodhbarnü agütsüogo.
Department of Telecommunication ajanga asüngdangba ka telangzüba agütsüba nung TRAI ajanga Licence Service Areas (LSA) nung ajemdaker iba senchi ya achi, ta shia lir. Airtel aser Vodafone-na prong dang senchi sen crore 1,050 achi aser Idea dang LSA 21 aser 19 atema sen crore 950 senchi achi.
LSA temzüng nung aliba aibelena Jio nem item telecom operator asem ajanga PoI shidak magütsü, ta TRAI-i taoba küm October ita aija liasü.
“Airtel, Vodafone aser Idea ajanga metetsümonga PoI ya Reliance Jio nem magütsür aser iba ajanga TRAI temzüng nung aliba ama meinyaker aser Reliance Jio amshir nem timtem agütsür,” ta TRAI-i Department of Telecommunication nem agütsüba shidi nung shia lir.