Tawang nung Mortar ka apokdang mitkar ka pokset, trok yiru

Itanagar, May 26 (Agencies): Brehostibarnü Arunachal Pradesh nung Tawang anasa ‘firing range’ ka nung mitkartem ‘exercise’ agiba mapang mortar ka target medongteti apok aser iba lendong nung mitkar ka pokset aser trok yiru.
Iba lendong nung yirur aliba mitkartem ya helicopter nung Tezpur-i bener ao. Yirur alir rongnung mitkar asem iba mozüki nung anepaludar aser kanga mejungi yirur aliba mitkar asem Kolkata nung aliba mitkar indang Command Hospital-i bener ogo.
Iba bomb tongtettsüba tesem metongteti apokba ya technical tsütsü meshidakba ajanga alitsü südi, ta osang ajanga ashi. Iba prangpong aser injang ya tendangtsü. Injang ya meshidaki lira injang ajunga ya tanaben teyangludaki meyiba yoktsü.
Iba lendong bushisüngdangtsü asoshi totuyuba agütsüogo aser iba osang ya anogo ter tsüngda nung angutsü imlar.
“Iba ama lendong ya kodanga madalokba mapa masü, saka takum samaba ya tia maka,” ta retired artillery officer kati ashi.
Iba lendong adalokdang takum samar aser yirur aliba kibungtem dang iba osang agütsüogo. Tawang ya Arunachal Pradesh nung ‘remotest outpost’ ka lir aser iba tesem nung aliba mitkartem ya timtem aiben ajurur. Tawang dang ya ‘Little Tibet’ ta ajar aser iba tesem ya India kübok lir saka China-ia par li, ta ashir aser India o China tsüngta tesendaktep ken o nung iba linük ya aiben atsüteper.
Rajasthan nung aliba Jaisalmer district nung 2016 küm January ita nunga iba ama lendong ka adalok aser iba lendong nung Border Security Force nungi nisung ana pokset aser pongu yirua liasü.