Tenemtsüng lenmang yangluba maparen nung tetsükdaktsü ajurur

Dimapur, May 26 (TYO): Nagaland Foothill Road Project mapa ya 2013 küm December ita nung tenzüka liasü, aser maneni iba mapa nung senotsü ajanga tetsükdaktsü ajuruogo.
Assam majangi Dimapur aser Tizit (Mon) sendakteptsü atema kilometer 300 dak tema lenmang section ana nung ali aonba mapa anendaka lir.
Ali aontsü mapa kilometer 8 (Naginimora sector nung kilometer 3 aser Niuland sector nung kilometer 5) dang anünga lir, aser iba atema sen crore 11.5 shi nüngdaker, saka senotsü maliba ajanga mapa anena project ajak anenogo.
May 26, 2017 nü Nagaland Foothill Road Coordination Committee (NFHRCC)-i Nagaland state sorkar dang iba mapa süoki ia asentenshia inyakdaktsüner, kechiyong iba lenmang ya ajanga state rongsenkettsüng ajungkettsü, ta mepishia metetdaktsüogo.
NFHRCC-i ashiba agi, Chief Minister-i April 27 nü telangzüba tajung agüja aliba atema teinyaktsü lir. Iba anogo nung NFHRCC züngsemtemi CM dang iba project indang metetdaktsü, aser ali aonba mapa renema inyaktsü atema senotsü lemzüktsütsü asoshi mepishia liasü.
NFHRCC-i ashiba agi, iba senden nung CM-i senotsü agütsütsüsa jenjang ka nung maliba lemsatepba den külemi pai iba atema Cabinet den jembiba sülen NFHRCC nem metetdaktsütsü ta ashi.
Iba atema CM-i mapangbo atakteta mashi, ta shia NFHRCC-i, tanü tashi nung CM nungi osang kecha mali mesüra pai Cabinet den jembi asü mejembiar memetet, ta metetdaktsü.
April 27 nü CM-i telangzüba tajung agütsüba nung ajemdaker NFHRCC-i CM dang iba onük atema cabinet den mejembii lira jembidaktsüner, ta mepishi.
NFHRCC-isa, iba project atema sen crore 70 bo agütsüogo, ajisüaka tesüiba küm asem tashi state sorkari nüburtem meyong project sendoker, ta ashi.