Angati Football coaching camp tembangogo

Kohima, May 26 (TYO): Kohima Local Ground nung Nagaland Football Coaches Association (NFCA) ajanga anogo pongu angati football coaching agütsüba sentong tanü tembangogo.
“Make Football Happen” omen nung ajemdaker iba sentong nung football asayar arishi küm 6 nungi 12 tsüngta aser Under-17 nem tesayuba balala agütsü.
Iba sentong nung adenertem den tepela o jembidang, iba sentong tembangaka maneni practice alitsü asoshi NFCA tir, Roko Angami-i ajungshi. Asayaba kisüng masü saka lesson azüngba nunga temolung agüja azüngtsü pai-sa ajungshi.
Pai maneni iba sentong nung atener dang coaches anasa kisüng discipline shidak amshitsü masü saka parnok dang tainba nisungtem akhum tsübua takok angutsü asoshi temoatsü meshitsü ajungshi.
Iba ama sentong ya Dimapur nung mezüng ayongzüka aka aser Kohima nung tanabuba sentong aka, maneni NFCA ajanga iba ama sentong ya tanga district tem nunga ayonga amongtsü, ta Roko-isa shisem.