Nashi ayoktsü nokdangba ozüng pelaa agizüker: Maneka Gandhi

New Delhi, May 27 (Agencies): Tanü Union minister, Maneka Gandhi-i, shiruru ayokba market nung nashi ayokba mesüra aliba nokdangtsü atema ozüng tasen yangluba ajanga shiruru mesenmetui mamshitsü, ta ashi.
Shiruru temeten atema inyaker aser Union minister, Maneka-i tamalena nashi tepsetba nokdangtsü aser linük tesem ajunga nung ‘zoo’ nokdangtsü atema jembia aruogo.
“Atangji nung atalokbaji- aluyimertemi kiset shiruru ti mesüra teku abentsü gari ka nung shiruru 80 tashi abener, iba sülen shiruru ayokba market-i oa itemji tepseter,” ta Women & Child development Union minister, Maneka-i ashi.
“Aluyimertemi shirangba nashi mesüra tashidak aliba nashitem tepsettsü atema item market-i bener aoer. Tang ozüng tasen yangluba ajanga item ama tatalokbatem malitsü,” ta laisa ashi.
Prevention of Cruelty to Animals Act, 1960 kübok May 25, 2017 nü Ministry of Environment and Forests (MoEF)-i Prevention of Cruelty to Animals (Regulation of Livestock Markets) Rules, 2017 nung ajemdaker kiset shiruru ayokba market nungi nashi ayokba mesüra aliba nokdangogo.
Environment ministry osang ajanga ashiba agi, Maneka Gandhi’er telok, People for Animals-i taoba environment minister, Anil Madhav Dave dang iba atema inyaktsü mepishia liasü.