Us sorkar den itasen data lemsateptsü asoshi Google-i memolung

May 27, 2017 (Agencies): US Labour Department-i Google dang parnok itasen data lemsateptsü asoshi asüngdanga liasü saka Google-i agütsütsü asoshi memolung. Parnoki ashiba agi data tem redrive asütsü asoshi kanga tasak asütsü.
Hokolbarnü osang ka ajanga ashiba agi, US Labour Department-i itasen dak sendakba nung Google anema ken o ka benokogo. Parnoki ashiba agi Google ya government contractor ka lir aser temzüng kübok parnoki sorkari asüngdangba langzütsü nüngdaker.
Google pur ya itasen agütsüba ren nung tetsürtem bendanga amshiba dak sendakba nung aitsüogo.
US okadak ka nung Google-i ashiba agi, Labour Department-i asüngdangba agütsütsü asoshi ghonda 500 aser sen $100,000 indoktsü.
Labour Department kübok Office of Federal Contract Compliance Programs (OFCCP)-i Google dang asüngdangbaji, kecha telatetka makai kanga dang aika mesüra iba ajanga miim data tem temai adoktsü, ta Google-i ashi.
“Onoki OFCCP’s audit tagidak atema parnoki meshibatem agütsütsü asoshi kanga meranga inyakogo aser taoba kümtem nung record meyirejang aika agütsüogo, koba nung compensation agütsübatema densema lir. Ajisaka OFCCP puri ashishiba karbo kecha telatetka makai kanga dang aika mesüra iba ajanga miim data tem temai adokdaktsütsü, anungji parnok dang iba osang magütsütsü ta shiogo,” ta Google otongdar-i ashiba osang ajanga metetdaktsü.
Otongdar-isa ashiba agi, parnoki asüngdangbatem rongnung Google nung mapa inyakertem indang jurila contract osangtem densema lir koba parnoki kümzüka ayutsü asoshi kanga meranger.
Labour Department-i ashishiba aitsüa Google-i ashiba agi, aprnoki asadangba nung itasen agütsüba yimya nung tetsür aser tebur na tsaüngda kecha tebendang mali aser itasen agütsüba model ajanga bendanga amshitsü nungi nokdanger. Ajisaka mapa inyakertem ajakibo iba küli magizüker.