Dmr District Level Coordination Committee senden menogo

Dimapur, May 26 (TYO): May 26, 2017 nü Deputy Commissioner, Dimapur Conference hall nung 2017-18 küm atema first quarter District Level Coordination Committee Review senden den külemi 100buba tobacco free institution sentong repsema agiogo.
Iba senden nung mendenbuba, Dimapur DC, Kesonyu Yhome-i iba anogo nung tobacoo free sangdongba school 12 densema Dimapur nung Tobacco free institutions ajak nem tenüngsang agütsü.
Tobacco free school certificate angubaji otsü ka tenzüker dang lir, ta shia pai item school tem dang chichiba tayongzükbaji tang ang tenzüktsü, anungji iba tebilemtsü nokdangtsü atema awareness campaign akatsüla, ta ajungshi.
Kasa sentong nung District Nodal officer, NTCP, Dr. C.Tetseo-i tesüiba küm ka tsüngda NTCP-i school aser college balala nung awareness sentong balala katsüba osang slide presentation ka ajanga metetdaktsü.
Shilem agirtem dang kümshia May 31 nü World No Tobacco Day amungba indang metetdakja Drpai school tem dang iba anogomung tajangzük ngua katettsü atema sentong balala ayonga amungtsü mepishi.
Iba senden nung Dimapur DC-i school 12 nem Tobacco Free School Certificate lema agütsü.