Kma nung KDLSA-i poster yangluba tetoktepba ayong agi

Kohima, May 27 (TYO): May 27, 2017 nü Kohima District Legal Services Authority (KDLSA)-i GMS, Kohima orphanage & destitute home nung legal awareness den “Tanurtem Temeten” omen nung poster yangluba tetoktepba sentong ka ayonga katsüogo.
Cyber Crime onük nung jembidang Panel Laywer KDLSA, Wapanginla Kichu-i Internet amshiba ajanga tajangzük aser takoksatem indang den külemi Information Technology act, 2008 aser Indian Penal Code kübok temerenshi balala indang metetdaktsü.
Laisa cyber-crime dak sendakba nung social networking sites nung taila profile amshia ozüng alema inyakba mapatem, online ajanga tesempatep adoktsüsa prokba, Email account hack asüba aser credit card ochimashi maparen atema temerenshi balala indang metetdaktsü.
Tanurtem Temeten onük nung jembidang Panel Lawyer KDLSA, Hisinlo Himb-i tanurtem indang temetentem, Right to Education act, Juvenile Justice act, 2000, Prohibition of Child Marriage act, 2006 aser tanurtem mapa inyakdaktsüba ajanga parnok temeten anema inyakba indang metetdaktsü.
Poster yangluba tetoktepba indang temetettsütem Panel Lawyer KDLSA, Zheviholi Swu-i metetdaktsü aser iba tetoktepba nung class 5-8 kaketshirtem parnok 20-i shilem agia liasü.
Mezüngbuba jenjang tanabuba aser tasembuba jenjang nung takok angurtemji Kevichulie, Cradle Ridge nungi Asangthang aser Jenithung liasü aser Yasongwo o Philip nati consolation sempet angu. Takok angur asem nem senpet sen 2,000, 1,500 aser 1,000 agüja liasü.
Kasa sentong nung Government Pleader, District court, Kohima, Alezo Kire-ia kaketshirtem dang lesson meranga azüngtsü aser sensakertem yaria ochi temeten agütsütsü asoshi tarutsü nung law azüngtsü ajungshia liasü.
Ano Alezo Kire-i tenlaba nanglong aser Zheviholi Swu-i tenlaba bandage tanurtem nema lema agutsü.
Kohima Orphanage incharge-i sentong tenzüka sarasadem aser tanurtemi ken ka ajanga shilem agi.
Iba sentong ya Panel Lawyer KDLSA, Keduvi leniba nung agia liasü.