DUCCF-i telungpur atema saru mesarutsü

Dimapur, May 27 (TYO): Dimapur Urban Councils Chairmen Federation (DUCCF)-i sangdong ka nung Naga National Movement akhümtsübur aser maneni Naga linük longjemtsü asoshi mapa inyaktsü, ta metetdaktsü.
Ajisüaka, Naga yimten asoshi inyakba maparen nung telongjem mali tashi, Naga nunger taginüba metongtettsü ta October 31, 2013 nü Naga nungertemi angateta, ‘Sorkar Ka, Saru Ka” yimyim ayimoktsü. Iba nung ajemdaker, DUCCF-i Naga Yimten telok shinga atema saru mesarutsü lemtetoogo, ta Media Cell, DUCCF sangdong nung shia lir.
ACAUT kübok October 31, 2013 nü Public Rally nung Naga nungertemi lemtetba nung ajemdaker DUCCF-i iba telemtetba bangzünga renem. Dimapur kübok kiyong balala nung nübortem tenzüktsü aser parnok taginüba atema inyaktsü asoshi Colony Council tem tenteta lir.
Naga nungertemi aginüba anema onoki mapa meinyaktsü aser Naga public-i , ‘Sorkar Ka, Saru Ka” ta bangzünga renema aliba anema council temi saru mesarutsü. Anungji, Naga Yimten Teloktemi sen saruba shiditem magütsütsü mesüra Chairman o Council züngsemtem dang sen sarutsü atema tetuyuba magütsütsü metetdaktsür, ta Media Cell, DUCCF sangdong nungsa metetdaktsü.