Kashmir nung Wani melenzüker Sabzar Bhat tepsetogo

Srinagar, May 27 (Agencies): Honibarnü Kashmir nung sepaitemi Hizbul Muhajideen commander aser pa den yariteper ka khaset aser iba atema lungkak aitdang civilian ka süogo aser aika yirua lir.
Arishi küm 27 tain Sabzar Ahmad Bhat ji taoba Hizbul commander Burhan Wani melenzüksang ta bilemer aser pa Tral nung sepaitemi khaset.
Yaküm sepaitemi Wani tepsetba sülen Kashmir lenden nung nübortemi India anema lungkak ait. Tatalokba balala nung sepaitemi nisung 100 shi khaset aser aika yirutsü.
Honibarnü J&K sorkari tensa tamajungba mekümdaktsütsü atema mobile internet shibangtsüogo aser külen Hurriyat Conference-i Bhat tepsetba atea tejashi nung Deobar nungi anogo ananü mokdangtsü sentong ayongzükogo.
“Sepaitem den khatepdang telungpur ana khaset. Tasürtem rongnung kaji Sabzar Bhatt ta jangjaogo aser pa ya Hizbul Mujahideen nung commander liasü” ta South Kashmir director general of police SP Pani-i ashi.
Bhat apur nem mesüra pa indang osang tejangja sangoktsür nem sen lakh 10 senpet agütsütsü ta India-i sangdonga lir.
Yaküm Wani tepsetba sülen Hizbul Mujahideen-i Kashmir commander tasen inyaktsü atema Mehmood Gaznavi shimer ta metetdaktsü aser nisung aikati ibaji Bhat indang tenüng tanga ka liasü ta bilem.
Tanep Bhat tepsetba osang angazükba sülen Pulwama, Shopian, Anantnag, Sopore, Kupwara aser Srinagar nung nisungtemi lungkak aittsü tenzük. Tesem aika nung lungkak aitertemi sepaitem dak lung agi ona rara aser sepaitemi lijak aser injang amshia azüok.
Tral anasa sepaitem aser telungpurtem tsüngda khatepdang civilian ka khaset aser asem yiru, ta Pulwama district ketdangser katia metetdaktsü.
Bhat tepsetba ajanga Hizbul Mujahideen-i tetsükdaktsü tulu angutsü kechiyong hopta ishika tejaklen tongti commander Zakir Musa-i telok den tesentaktep pilaogo, ta police ketdangser kati ashi.
“Hizbul Mujahideen-i Kashmir nung telok ketdangsütsü atema Pakistan nungi nisung ka yoktsüsa akümtsü saka ibaji tamakoktsü” ta paisa shisem.
Hizbul Mujahideen ya India, United States aser European Union temi kiralongrar telok ka ta züngoka lir. Iba telok nung tanishisangji Syed Salah-ud-din lir aser pa Pakistan-occupied Kashmir (PoK) nung alir.