Nagaland Assembly anentsü mulunga lir

Telok ka den jembiba ajanga telemtetba magitettsü: CM

Kohima, May 27 (TYO): Naga yimten tebilemtsü atema olemtep agiba ajanga ajaki agizüktsüsa aser mulungtsüsa telemtetba ka agira parnoki menden toktsütsü ta züngsem 60 agi akümba Nagaland State Assembly (NLA)-i tanü nenshia metetdaktsüogo.
Honibarnü Special Session alidang, Assembly züngsemtemisa Centre dang küm 20 jungnüa yimtem tebilemtsü atema olemtep agiyonga aruba tekaratiba nung telemtetba ka agitsü aser kokra, 2018 küm Assembly election matongdang lemtettsü atema tayongzükba agütsü.
Naga yimten tebilemtsü ya mapang talangka metembangteti arur aser iba tebilemtsü atema Centre o NSCN(IM) na olemtep tenzükera joko küm 21 ajunger, ta Advisor to Chief Minister, MLA Dr T M Lotha-i ashi.
Olemtep liyonga arudang telok ana tsüngda August 3, 2015 nü Framework Agreement ka agiogo aser joko olemtep tatembangleni arudar. Ajisüaka, Naga nunger melongjemba agi, telok ana tsüngda telemtetba ka agitsü atema tetsükdaktsü ajurur. Yimten tebilemtsü koktettsü atema Naga nunger tema aser telung nung alirtem ajak longjemtsüla, ta Dr T M Lotha-i ayongzük.
Yimten tebilemtsü atema olemtepba teloktemi tanüngba teloktem olemtep nung adentsü atema jaoktsüla. Yamaji inyak nungdang tatembang telemtetba ka agitettsü, ta paisa shisem.
Sorkar anenba sülen telemtetba ka agitsü ta masü saka telemtetba ka agiba sülen ang assembly anentsü ta sorkari Naga nunger dang jangjajangja metetdaktsütsüla, ta Dr T M Lotha-isa ashi.
Idangji, Chief Minister Dr Shurhozelie Liezietsu-i “iba tebilemtsü ta koktettsü kanga tasak aser Naga telungpur telok ka den dang jembiba agibo, ajaki agizüktsüsa aser mulungtsüsa telemtetba ka magitettsü” ta ashi.
Iba jagi state sorkari Naga yimten telok ajak den ajurutepa sendentem amener aser telemtetba tajung ka agitsü atema parnok tsüngda angatetteptsü mepishia arur, ta Dr Shurhozelie-isa shisem.