Nagaland Assembly-i GST Bill agizükogo; Nübortem dang mepishir

Kohima, May 27 (TYO): Honibarnü Nagaland State Assembly indang Special Session nung Goods and Services Tax (GST) Bill agizükogo.
Chief Minister Dr. Shurhozelie Liezeitsu-i Finance portfolio bena lir aser tanep pai assembly nung GST bill benok aser züngsemtemi voice vote ajanga agizüka ayu.
Bill agizüka mayudang olemtepba mapang ka agi aser idangji Roads & Bridges Minister, Y Vikheho Swu-i ashiba agi, “Nagaland nung GST benokba ajanga tajangzük aika angutsü. GST ajanga trade & industry aser talirtem atema tajangzük agütsütsü aser state sorkari saru teimba angutsü.”
GST indang inyakyim tasen ya shishilembartem aser public-i metettsüla aser inyakyim sülen anidaktsüla. GST goods & services indang sen agütsüba ajak züluoka ayutsü aser tsüngsü bushitettsü. Original producer nungi retailer jenjang tashi nung osang metettsü, ta Vikheho Swu-isa ashi.
Nagaland nung internet connectivity junga mali aser iba khuret atema Centre sorkari North east atema balaka 100 mbps satellite link ka yanglutsü. Iba ajanga meta talang pilar aliba tesemtem nunga telecommunications tajungba akümtsü, ta paisa shisem.
School Education & SCERT Minister, Yitachu-ia ashiba agi, GST ajanga state senpongi saru shitak angutsü, kechiyong iba ya ajanga saru aika saruba ka kümdaktsür.
“Ajisüaka, Nagaland nung non-local shishilembartem, talisa Dimapur nung parnok indang shishilembabaji STs aser SCs tenüngtem nung züluoka lir. Parnoki saru magütsütsü atema iba amai inyaker saka iba ya ozüng alema inyakba mapa ka lir. GST inyaksangshi ajanga iba ozüng alema inyakba mapa agientsü imlar” ta Yitachu-isa ashi.
Olemtepdang DAN Chairman aser Financial Advisor to Chief Minister, MLA TR Zeliang-ia ‘technology checking’ ajanga ochimashi aser ozüng alema sen amshiba samatsütsü tayongzükba agütsü.
Taoba mapa sorkar senpongi saru aitbaji noklang nung shilem 30-40 shi ka liasü saka GST kübok saru 100% aittsü. GST tenzükba ajanga ‘total tax payable’ ji shilem 28 ajema akümtsü, kechiyong tang saru 32% agia aliba nungi toll tax, excise tax, mesüra entry tax amala agientsü. Iba ya ajanga talirtem tajangzük angutsü, ta TR Zeliang-isa shisem.
GST kübok küm nung sen lakh 10 aser tema angurtem dak aittsü, anungji shishilembar tilatem aser talisa yimtsüng amala nung aliba shishilembartemi arentaka mebilemtsüla, ta paisa metetdaktsü.
GST atema olemtepdang Housing Parliamentary Secretary Levi Rengma aser Tourism Parliamentary Secretary C Apok Jamir natia jembi.
MLA temisa Naga nunger dang GST mapa küma aotsü atema mulunga agizüktsü mepishia metetdaktsü aser parnokisa ashiba agi iba ajanga state renloktsü aser tejakleni aotsü.