J&K nung Angh yimsüsüba benoktsüla: Farooq

Srinagar, May 28 (Agencies): Tanü taoba mapang Jammu & Kashmir Chief Minister, Farooq Abdullah-i, linük nung tamangba loktitem tsüngda rara adoka aliba azüoktsü atema Jammu & Kashmir nung tekaratiba Angh yimsüsüba benoktsüla, ta ashi.
Srinagar nungi tang tasen shimba MP, Farooq-i, “Onoki kodanga Angh yimsüsüba pusema maru, saka onoki ibaji anema aruogo. Ajisüaka tanga lenmang mali,” ta ashi.
Tawa Ato kilonser, Narendra Modi-i National Conference tongti lenir, Farooq New Delhi-i jaoka Kashmir onük nung o lemtepa liasü, aser tanü pai, ita aika state tensa mesüngjemteti aruba ya Modi-i yimjung lenmang agi dang temdaktsüner, ta ashi.
“Ato kilonser den ni lemtepba onüktemji ni lemsatsü makok. Ni ashitsü ajak agi, pai state tensa atema tebilemtsü katsür aser iba ya tembangdaktsüner. Yimjung lenmang agi dang tembangdaktsüner,” ta Farooq-i ashi.
J&K Chief Minister, Mehbooba Mufti’er sorkari South Kashmir nung dang masü saka Kashmir rangben nung tamakok nguogo, ta paisa aitsü.
“Item tatalokbatem ajanga linük nung tanüngba tesemtem nunga tamangba lokti tsüngda rara adokdaktsür. Anungji tekaratiba nung iba tebilemtsü atema inyaktsüla,” ta paisa shisem.