Sukhoi-30 indang Black Box ngutetogo

Tezpur, May 28 (Agencies): Sukhoi-30 MKI fighter jet nung pilot ana mener samaba tayimtsü teraksa ya Arunachal Pradesh indang arem min nung nguteter anogo ananü buba nung iba tayimtsü indang ‘black box’ ngutetogo. Saka tayimtsü nung mena alisang nisung ana indang osang kicha monguteti lir.
“Ali nung iba tayimtsü bushir telok kati iba tayimtsü tsükokba tesem tonga otet. Iba tayimtsü indang ‘black box’ ngutetogo aser anu maneni bushitar,” ta Air Force indang odongtar Wing Commander, Anupam Banerjee-i tanü Delhi nung-i ashi.
Iba tayimtsü ya training agitsü atema Tezpur Air Force station nungi Mongulbarnü (May 23) abusor mapang talangka melie sama aser tayimtsü teraksa ya Tezpur nung tayimtsü anendak nungi kilometre 60 orr arem min nung Hokulbarnü ngutet.
Iba lendong adalokba bushisüngdangtsü asoshi Air Force ajanga totuyuba agütsüogo.
Iba Sukhoi-30 MKI fighter jet teraksa ya tayimtsü nungi bushirtemi ngutet aser tanü iba tesem tonga otetogo. Iba tesem ya arem min tulu aser tsüngsang kanga majungba ajanga mezüng aor teloki metongteti liasü.
Russia nung yangluba raradang amshiba tayimtsü mezüng batch ya IAF nung 1990 nung züngok. Iba sülen item tayimtsü ya 7 tashi tsükokogo.
Arunachal Pradesh nung aliba China aser India arrtsü anüktsü asoshi SU-30 MKI tayimtsü ya Tezpur airbase-i 2009 June 15 nung yoka liasü.
Tang Tezpur nung tayimtsü 36 aliba squadron ana yoka lir.