Kamtapur Liberation Organisation telungpur asem apu

Agartala, May 28 (Agencies): Assam nungi Kamtapur Liberation Organisation (KLO) telungpur asem Tripura kübok Gandhachera subdivision nung puogo. Parnok asem ya Bangladesh nungi India-i aiter lia apu.
Parnok asem ya Assam police nem agütsüogo, kechiyong pa asem ya keno tanga atema par state-i nüngdaka liasü, ta police ketdangser kati ashi.
“Goutam Roy, Padma Deka aser Manashjyoti Deka nunger Tripura State Rifles (TSR) temi meita aoba mapang nung puogo. Parnok asem Raishyabari Police Station OC (officer in-charge) ket nung agütsü. Par asem dang asüngdangyaba mapang parnok ya KLO nung züngsem lir ta meteta aru,” ta Sub-divisional Police Officer (SDPO) Gandacherra, Jawharlal Debbarma-i osangbenertem dang ashi.
Bangladesh kübok Chittagong Hill Tracts nung Kamtapur Liberation Organization (KLO) camp nung training agir India-i meyipa aruba mapang telungpur asem ya apu. Udalguri nung Kaliagaon ken o dak sendakba nung telungpurtem ya Assam police-i bushia liasü. Tripura police-i Assam police nem osang agütsüba sülen Udalguri Chief Judicial Magistrate (CJM) kübok obendangtsü asoshi parnok asem ya parnoki anir ao.
“Parnok asem ya Raishyabari arrtsü len Bangladesh nungi India-i aitba dak sendakba nung aija okadak agütsü. Parnok asem anogo asem tashi soita ayuba sülen Kalaigaon ken o dak sendakba nung Udalguri district police-i bushir ta ngutet. Iba sülen Assam police iba okadaki aru aser parnok aputsüba kuli kaket sayur anir ao,” ta Assistant Public Prosecutor, Mintu Sinha-i ashi.
Iba tatalokba ajanga northeast nung telungpurtemi parnok Bangladesh-i aitsü asoshi Tripura ajanga senzüba tali jangjaogo. Tripura aser Bangladesh arrtsü ya kilometre 857 lir.