Mike Pence-i ‘Christians United for Israel’ nung o jembitsü

Washington, May 31 (Agencies): ‘Christians United for Israel’ ya US nung Israel pusemba telok tulutiba lir aser taküm July ita parnok mungdang alitsü.
Iba telok ya John Hagee-i tenzükba lir aser tang pa mendenbuba inyaker. Hagee ya Texas nung arogo ka nung sannükr lir. Christians United for Israel (CUFI) nung nisung million 3.5 züngsema lir aser Washington nung amungtsü aliba mungdang nung aika adentsü imlar.
US Tatong Tir, Pence-i evangelical lennirtem aser Trump White House tsüngda tesentaktep tajung ka ama inyaka arudar.
“Taküm Washington Summit nung tatong tir adentsü mulunga agizükba atema onok kanga pelar” ta Hagee-i metetdaktsü.
“Tir Trump-i office nung ajemoka mapa inyakba mezüng anogo nungi US-Israel tesentaktep takangba aser tajungba kümogo. Trump’er sorkari Yihuda linük pusema nungitba atema onok kanga pelar” ta paisa shisem.
White House-i Israel den tesendaktep tajungba akümtsü atema mapa inyaker. US sorkari Washington nung Israel Prime Minister Benjamin Netanyahu aser Palestiner President Mahmood Abbas na jaoka sendentem menogo.
Trump-i Tir akümba sülen mezüng atema bendanglen semdangba sentong nung pai Israel/Palestine dak mezüng agüja semdangogo.
Hagee-i mapang talangka nungi Trump-Pence administration pusema arur aser pai Adolf Hitler, homosexuality aser Catholic Church anema jembiba atema nisungtemi ashishiteper.
Christians United for Israel (CUFI) ya July 17-18 anogotem Washington nung amungtsü sentong lir.