Android yanglur Andy Rubin-i Essential phone saya

California, May 31 (Agencies): Google indang Android software yanglutetsang, Andy Rubin-i smartphone sayaogo.
Technology investment company, Playground yanglutsü asoshi Rubin-i 2014 küm Google yutsü. Essential phone ya Playground company ajanga sen agütsür yangluba company indang mezüngbuba phone lir.
Iba smartphone indang operating system ya Android lir aser US nung sen $699 agi ayok tenzükogo. Ajisaka iba phone ya brand yanglutsü asoshi shishilembadaki aitsü tasak asütsü.
Smartphone indang market nung Samsung company indang shilem tuluba lir. Alima ajunga nung iba company indang share ya shilem 21 lir aser Apple indang shilem 14 lir.
China nunger phone yangluba company tulu temi jenjang tajemba nung phone ayokba ajanga company tila atema market share nung maongka tajung monguteter aser Essential Phone indang sen jenjang asakba ajanga phone shishilembaba nung jenjang tajung ngutettsü tasak asütsü südi, ta bilemer.
Ajisaka California nung Rubin-i nüburtem den jembidang, Samsung ama Android market nung company tajung kar-i shilem tulu agitettsü maongka lir, aser Essential ajanga iba maongka agitsü nükjidong lir, ta ashi.
Essential Phone ya titanium agi yanglu aser tesülen camera ya 360 degree nung noksa tangokteter.
Tesülen camera ana lir aser iba ajanga tesangwa peria maliba mapang noksa junga tangokteter. Tejaklen aliba camera ya 8-megapixel sensor keta lir.