Morocco nung longkak aiter lenir chioktsü asoshi nüburtemi akhanger

Morocco, May 31 (Agencies): Morocco nung aliba Rif region nung nisung meyirjang aika sendena longkak aitba mapang pua aliba lenir chioktsü akhang.
Arishi küm 39 tain, Nasser Zefzafi densema nisung eshika mitkartemi Hombarnü apu aser Casablanca-i anir ao. Hokulbarnü Mosque nung o jembiba mapang meinprongba ajanga Nasser ya apu.
Al Hoceima yimti tiyong nung Mongulbar aonung nisung meyirjang aika sendena ‘onok ajak Zefzafi’ aser ‘mitkar tashi amshiba anenang’ ta ayimten aser iba mapang nisung aikati Nasser indang noksa amer yimtong nung jaja.
Item longkak aitertem senshidaktsütsü asoshi Anti-riot police temi merang, saka longkak aiter temi akhang akhanga nokdak.
Taoba küm October ita nung ango ayoker ka asüba sülen Rif region nung nüburtem makmakshimak nung lir.
Ango apuba mapang süyir arishi küm 31 tain, Mouchcine Fikri-i apuba swordfish tem mitkar temi apu aser iba anema nokdakba ajanga pa tepset.
Fikri nem ochi obendang agütsütsü asoshi takhangba agütsüba nung nüburtemi mapa aser rongsenketsüng meshi tenzük aser iba mapang Zefzafi, shiba mapa meinyaker lir, pa ya Al-Hirak al-Shaabi/Popular Movement nung lenir ka aküm.
Iba ama longkak aitba ya Imzouren, Rabat aser Casablanca tesemtem nunga liasü.