July 1 nungi GST mapa küma inyaktsü state temi melunger

New Delhi, June 03 (Agencies): Honibarnü GST (Goods and Services Tax) Counci-i anünga aliba ozüngtem ajak nung telemtetba agiogo, aser July 1 nungi tenzüka iba ya mapa küma inyaktsü atema state temi melungogo.
Senden temangba sülen New Delhi nung osangbenertem den jembidang Kerala Finance Minister, Thomas Isaac-i, “Onoki ozüngtem nung o lemtepogo, aser iba maparen tembangogo. Transition ozüngtem ajak latetogo, aser July 1, 2017 nungi tenzüka iba ya mapa küma inyaktsü atema ajaki melungtepogo,” ta metetdaktsü.
Taoba ita GST Council-i goods 1,200 aser service 500 nung saru shilem 5, 12, 18 aser shilem 28 lateta liasü.
Taruba Honibarnü Union Finance Minister, Arun Jaitley leniba nung 15buba GST Council senden amentsü, aser iba mapang nung hon, textiles aser tsüngsem densema osettsüset trok nung saru shilem latettsü.
West Bengal Chief Minister, Mamata Banerjee-i, lar state-ibo tang ama telatetbatem nung ajemdaker iba maparen meinyaktsü, ta jembiogo, ajisüaka Honibarnü senden nungji West Bengal state Finance Minister, Amit Mitra-a adentsü, ta osang angazüker.