Northeast nung telungpur rara ajema kümdar: Rajnath

New Delhi, June 03 (Agencies): Northeast nung security sepaitemi telungpur 900 shi pua kiralongrar 52 tepseta telungpur mapatem anema inyakba ajanga NE nung telungpur dak sendakba rara ajema kümogo, ta tanü Union Home Minister, Rajnath Singh-i metetdaktsü.
Singh-i ashiba agi, security sepaitemi Bodo telungpur telok NDFB(S) tongtiret raksatsüogo, aser ibaji ajanga tesüiba küm asem nung Modi-i aniba sorkari telungpur dak sendakba rara kanga ajema kümdaktsüogo.
Paisa, NDFB telungpur 911 puogo aser 52 tepsetogo, iba den külemi kasa mapang nungsa prangpong aser injang aika puogo, ta ashi.
“Onoki National Democratic Front of Bodoland/Saoraigwra (NDRB(S)) anema junga inyaktetogo,” ta pai ashi.
“Parnok anema maneni rara aruogo. Onoki parnok tongtiret raksatsüogo,” ta pai osangbenertem dang ashi.
Singh-isa, Northeast tesem nung telungpur anema küm aika raraa aruba sülen tesüiba küm asem nung security sepaitemi telungpur anema maneni inyaka aruba ajanga tesem nung tesünep lir, ta ashi.
1997 küm nungi tenzüka telungpur dak sendakba rara tajemtibaji 2015 küm liasü aser 2016 küm ano tajemba aküm.
Paisa, 2014 küm telungur dak sendakba rara tatalokba 824 liasü aser 2015 küm nungbo 524 dang liasü aser yakümbo 484 tashi ajema alu, ta ashi.
Northeast nung civilian asüba-a ajema aluogo. 2015 küm civilian 48 asü aser 2016 küm nungbo 46 dang asü.
2008 küm nungbo civilian 466 tashi asü.
Tesüiba küm asem nung Home minitry-i inyaktetbatem indang metetdaktsüdang pai item osang ya lemsatepa liasü.
2014 küm nisung apuba tatalokba 369 liasü, 2015 küm 267 liasü aser yakümbo tatalokba 168 dang liasü, ta paisa metetdaktsü.