Anshu Jamsenpa-i Arunachal aser Nagaland Angh ajuru

Itanagar/New Delhi, June 03 (Agencies): Arunachal Pradesh tsür, Anshu Jamsenpa, shibai anogo pongu tsüngda Mt. Everest tenem kolaki anaben tashi tuteta otsü tasen ka yanglua liasü, lai tanü New Delhi nung Arunachal Pradesh aser Arunachal Pradesh Angh, P.B. Acharya ajurua liasü.
Anshu aser Angh na ajurutepba senden nung Angh kinüngtsü, Kavita Acharya, Anshu kinüngbu aser All Arunachal Pradesh Mountaineering & Adventure Sports Association Tir, Tsering Wang aser PR Assistant, D.K. Chauhan nungera liasü.
Iba mapang nung Angh aser la kinüngtsü nati la nem tenüngsang agütsüba den külemi tarutsü nunga lai inyakbatem nung takok angutsü moaja liasü.
Angh aser kinüngtsü nati, lai tenemi atuba tsütsü takok ngutetbatem ajanga Arunachal Pradesh nunger dang masü saka North East aser India nunger ajak nüma tangdaktsür, ta ashi.
Senden nungsa la dak temelungtetba shisa tulu aliba tanela ngua parnok kanga süngmang.
Lai tenemi atuba maparen nung tayongzükba aika kokteta state aser NE dang masü saka India nunger ajak nem konang nüngsang bener arutsütsü imlar, ta parnokisa ashi.