Phek nung ita ka piyong süngdong atemba sentong tenzükogo

Dimapur, June 03 (TYO): Department of Environment Forest & Climate Change, Phek Forest Division aser District Administration, Phek senteper ayongzüka June 03, 2017 nü Phek nung “Green Phek-Connecting with Nature” omen nung ajemdaker ita ka piyong süngdong atemba mapatong ka tenzükogo.
Iba sentong ya Phek Deputy Commissioner, Kovi Meyase-i June 3, 2017 nü Phek nung tenzüktsüogo, aser iba ya June 4 nü Green Environment Sunday aser June 5 nü World Environment Day den sendaktepa lir.
Iba sentong ya süngdong atemba mongpu piyong Phek district nung süngdong tema arem aser alima kümzüka ayutsü nükjidong nung lir.
Sentong nung jembidang Phek DC, Kovi Meyase-i nüburtem dang iba mapatong nung amalitepa inyakba ajanga temeket aser arem kümzüka ayutsü ayongzük.
Paisa Forest Department-i iba mapatong achaayanga tenzükba atema pelaba lemsatep.
Iba sentong nung menden, DFO Phek Rongsenlemla Imchen-ia nüburtem dang süngdong tema yutsübatem anepalutsü atema mepishiba den külemi nüburtem dang amalitepa inyaktsü ayongzük.
Phek Town Baptist Church Pastor, Thepuchiyi-i sarasademba sülen plantation programme tenzüka liasü.
Tan mongpu nung Forest department-i nüburtem aser lokti tentet balala nem süngdong 4,200 shi lema agütsüogo.