Praneeth Thailand open final-i iogo

Bangkok, June 3 (Agencies): India nung badminton asayar B Sai Praneeth-i Thailand open semifinal asaya nung Thailand nunger asayar Pannawit Thongnuam minute 36 agia tebur kija asaya nung 21-11, 21-15 agi ayong ayonga kokogo.
Alima nung tebur asayartem rongnung jenjang 24 nung alisang India nunger asayar ya final nung Indonesia nunger asayar Jonatan Christie den asayatsü. Jonatan-i semifinal asaya nung Malaysia nunger asayar Joo Ven Soong 21-9, 21-18 agi minute 34 agia akok.
Honibarnü asaya nung Praneeth-i kanga junga point 4 agi tejakdang sür asaya tenzük aser iba sülen maneni junga asayaa pai mezüngbuba asaya 21-11 agi akok.
Semifinal tanabuba game nung Pannawit-i akoktsü asoshi kanga meranga asaya saka Praneeth-i pa dang nungi tajungba asayateta iba game 21-15 agi ayong ayonga akok.
Olympic nung medal angula Saina Nehwal iba asayamong nung Honibarnü asaya tamakok ngua asayamong nungi toguogo.
La Thailand tsür Busanan Ongbamrungphan-i 19-21, 18-21 agi tsükdaktsü. Tena asaya minute 53 tashi asayaa liasü.
Alima nung jenjang 11 nung alila Saina iba asayamong nung tanabuba jenjang nung liasü aser la den asayala ya jenjang pezübuba nung liasü.