North Korea-i maneni raradang amshiba oset yanglutsü: KCNA

Seoul, June 04 (Agencies): North Korea-i raradang amshitsü nok-nü yangluba anentsü asoshi United Nations (UN)-i ozüng tesashi agütsüba ya khenyongi magizüker aser iba maparen maneni inyaktsü, ta North Korea sorkar meyong news agency, Korean Central News Agency (KCNA)-i Deobarnü ashi.
North Korea-i maneni missile tendangba ajanga United States aser Pyongyang tembar tajung, China-ia molunga iba raraba oset meyanglutsü asoshi UN Security Council ajanga Hokulbarnü tenokdangba agütsü.
UN-i tenokdangba agütsüba nung ya tsükchir temi ashioktsüba mapa lir aser iba ajanga Democratic People’s Republic of Korea (DPRK) indang nuclear tashi ya tashiyim agi anendaktsütsü aser iba ajanga rongsenkettsüng nung tesama aludaktsütsü, ta North Korea indang foreign ministry odongtar-i ashiba osang ka KCNA ajanga sangdong.
“Tenokdangba ji kechi koma arudir aruaka asenoki aser linük tashi aser linük ka aliba temeden kümzüka ayutsü asoshi nuclear tashi tuluba küma yanglutsü aser takok mangu tashi maneni inyaktsü,” ta odongtar-i ashi.
North Korea-i 2006 küm mezüngbuba nuclear tendangba mapang nungi tanü tashi UN Security Council ajanga tenokdangba agütsübatem kata mangai arudagi aser linük ka kümzüka ayutsü indang temeden raksatsür, ta North Korea-i ashir.
North Korea-i nuclear aser missile yangluba sentontem anendaktsütsü asoshi United States-i kanga merangaka takok monguteti lir aser United State atongtsüsa nuclear aliba missile yanglutsü Pyongyang-i nangzüka lir.
Pyongyang-i nuclear aser missile yangluba anendaktsütsü asoshi Trump administration ajanga China dang kanga ajungshir.
UN Security Council ajanga North Korea nem tenokdangba agütsüba ya US aser China-nati molungba nung inyakba lir, ta North Korea-i aitsür.