Iraq sorkar busemertemi IS tesep ka agitetogo

Mosul, June 04 (Agencies): Syria arrtsülen Mosul nung Islamic State (IS) kiralongrar temi amokbanga aliba tongtibang tesem ka Iraq sorkar busema rarar temi Deobarnü agitetogo, ta mitkar osang ajanga ashi.
Popular Mobilization Force (PMF) temi Mosul nungi kilometre 130 orr aliba al-Baaj district nung IS kiralongrar aliba tesep tanaben agitetogo, ta PMF indang lenir, Abu Mahdi al-Muhandis-i osangbener dang ashi.
PMF aser Iraq nüburtemi al-Baaj agitetba asoshi benjungtepogo aser Syria den arrtsü nungi kiralongrartem aridokba ya takok tulu lir, ta al-Muhandis-isa shisem.
Muslim nunger asoshi temeshi ita, Ramadan nung süaka tanen maka raraba asoshi al-Muhandis-i par telok dang pelaba ashi aser iba raraba mapang nisung taküm aika samaogo aser rongsena yamaji laluogo, ta shisem.
Saka iba rara nung par telok nungi mesüra kiralongrar asüba tejangja bo Abu Mahdi-i mashi.
West Mosul nung PMF temi IS den raraba mapang mitkar aser police temi yimti tiyong nung raraba mapang lir.