Manmohan-i GDP ajema akumtsü ta takzüba shitak atalokogo: Jaipal

Hyderabad, June 04 (Agencies): Taoba Ato kilonser, Manmohan Singh-i, demonetisation ajanga GDP ainba rate ajema akümtsü ta takzüba shitak atalokogo, ta Honibarnü Congress lenir tain, S Jaipal Reddy-i ashi.
Hyderabad nung Press Club of Hyderabad-i ayongzükba ‘Meet the Press’ sentong nung jembidang Jaipal-i ashiba agi, “Pai (Manmohan Singh) Parliament nung minute 6 dang jembia liasü, aser iba mapang nung pai, National production rate shilem 1 mesüra 2 ajema akumtsü ta metetdakja liasü.”
“Kodang asenoki India tesem ajak indang asadangdir, shilem ka (GDP) tetezü, linük nung sen lakh crore 1.50 jenjang production ajema akumba lir. Yakünü sorkari sangdongba osang nung National production rate shilem ka ajema akumba metetdaktsüogo,” ta Congress lenirisa ashi.
Yaküm Narendra Modi-i aniba Centre sorkari benokba demonetization ajanga India indang GDP ainba shilem 6.1 tashi ajema alua alima nung rongsenkettsüng jenjang tekaratiba ainba jenjang makai küma China linüki ajatetogo.
Yakünü Central Statistics Office (CSO) osang ka ajanga metetdaktsüba agi, 2016-17 küm tatemsabuba ita pezü nung India’er Gross Value Added (GVA) shilem 5.6 tashi ajema aluogo.
“Ato kilonser, Narendra Modi-i demonetisation ya asüngsashiba ka lir ta jembi aser ibaji ajanga nüburtem anogo 50 shi dang tim-atemtsü ta jembi, ajisüaka ibaji ajanga nisung crore aika yimtitem nungi peipei yimdaki aotsüsa aküm. Iba den külemi aluyimertemi alu nung aonsotsütema metsünütet,” ta Reddy-isa ashi.
Modi-isa India nungeri bendanglen ochimashi sen rizünga aliba sen lakh crore 80 meyipa bener arutsü ta nangzük. Saka tawa BJP-i aniba NDA sorkari Supreme Court dang, International teloktemi black money alirtem osang nokdanger ta metetdaktsü, ta Congress lenirisa ashi.
Reddy-i, Modi nem vote agütsürtemi kechiba US Tir, Donald Trump aitsür? ta asüngdang.
“Modi nem vote agütsürtem dang ni ya asüngdanger- Nenoki social media nung pa (Modi) pusemer. Ajisüaka kechiba nenoki Trump bo aitsür? Trump ji shiba? Paji America nunger Modi lir,” ta Reddy-isa ashi.