Nashi metepsettsü nokdangba indang tebilembatem agizüktsü: Harsh Vardhan

New Delhi, June 4 (Agencies): Sorkari nashi metepsettsü atema tetuyuba ka agütsüba sülen linük nung ashishitep ken o tuluka adoka tejembidak nung, Environment Minister Harsh Vardhan-i Deobarnü par ministry-i iba dak sendakba nung tebilembatem agizüktsü mulunga lir ta ashi.
Iba tetuyuba agütsüba ya nisung kar achiajemba anema mesüra shi alepba maparen nung timtem agütsütsü mesüra telok shinga anema masü, ta Vardhan-i ashi.
“Tebilembatem lemsatepogo aser ibaji onoki meyipa reprangshitsü. Iba onük ya sorkari tenüng tajung agitsü atema inyakba masü” ta paisa shisem.
Yimtenren telok balalai tebilembatem lemsatepba meyipa reprangshir asü masü, sorkari iba onük atema tanga tebilemba ali asü mali ta osangbenertemi asüngdangba langzüdang Minister Vardhan-i iba osang ashi.
Nashi metepsettsü atema ozüng tasen yangluba ajanga linük ajungalen nisungtemi ashishiteper aser Kerala o West Bengal sorkartemi Centre indang tetuyuba anema kanga tekong meranga nokdaker.
“Iba tenokdangba ya democratic inyakyim aser linük temzüng anema lir. Ozü sorkari iba tenokdangba magizüktsü” ta West Bengal Chief Minister Mamata Banerjee-i shiogo.
Tamil Nadu nunga Madras High Court-i iba tetuyuba ya hopta pezü atema thiena atatsü telemtetba agiogo. Tenokdangba tasen agütsüba anema okadak ken o ka benokba sülen parnoki iba telemtetba agi.
Madras High Court nung benokba ken o nung, iba tenokdangba ya kiji inyaknüba inyaktsü nüjiso, pei tepok atema ayangtsü temeten aser state sorkar indang tashi alema inyakba lir, ta shia lir.
Ajisüaka, tanü Minister Vardhan-i ashiba agi, “Prevention of Cruelty to Animals Act kübok yangluba teinyaktsütemji chiyungtsü achiba yimya mesüra shiruru tepseta ayokba maparen anema masü” ta ashi.
Tamil Nadu kübok Madurai, Coimbatore, Erode aser Hosur tesemtem nung iba tenokdangba anema lungkak aitba sentongtem ayongzüka agiogo.
Madurai nungbo Tamil nunger telok kati nashishi achiba tetoktepba ka ayongzüka agiba atema police-i züngsem kar apu.
IIT-Madras nunga kaketshir telok kati May 28, 2017 nü campus nung ‘beef- fest’ ka ayongzüka amung.