Assam nung tzümetsüng aser anentsüh ajanga timtemer

Guwahati, June 4 (Agencies): Assam nung tzümetsüng ajanga nisung 13,000 shi timtemer aser anentsüh aluba ajanga Barak Valley tsütsülen train mesenzüteter, ta Deobarnü ketdangsertemi metetdaktsü.
Assam State Disaster Management Authority ketdangsertemi ashiba agi, tesüiba ghonda 14 tsüngda Lakhimpur, Jorhat aser Biswanath district tem nung tzümetsüng ajanga yimtsüng 28 kongshia lir aser nisung 13,000 shi timtemer.
Tenemtem aliba Dima Hasao district nung anentsü timtem ajanga Barak Valley-i aoba train lenmang shibangogo. Honibarnü Northeast Frontier Railway (NFR)-i Lumding nung Silchar-i aoba passenger train ka athitsüsa aküm, ta ketdangsertemisa shisem.
Brahmaputra ayong nung tzü kanga yimtendar aser Nimatighat nungbo ‘danger level’ ajanga tuogo. Iba jagi Jorhat nungi Majuli-i aoba rongtem mesenzüdaktsür, ta ASDMA-isa metetdaktsü.
Assam sorkari tzümetsüng timtem ajuruba district tem nung ketdangsertem dang relief & rescue osettsüset anepalutsü atema tetuyuba agütsüogo.