Kiralongrartemi London nung nisung 7 tepset; Police-i 12 apu

PM Theresa May-i ‘Islamist extremism’ aitsür

London, June 4 (Agencies): Honibar aonung London Bridge aser temeket nung nisung 7 tepsetba aser 48 yirutsüba lendong atalokba sülen British Police-i tanü iba dak sendakba nung nisung 12 puogo ta metetdaktsü.
“Met nungi Counter Terrorism Command ketdangsertem tanep Barking, London nung nisung 12 puogo. Parnok ya yasüng London Bridge aser Borough Market tesem nung atalokba lendongtem atema apu. Onoki Barking nung maneni ki kar mita reprangdar” ta London nung Metropolitan Police-i metetdaktsü.
Honibar aonung London Bridge nung van gari temesüng kati nisungtem dak atsük, iba sülen gari nungi nisung asem kimai alu aser anameta aliba Borough Market nung nisungtem dak kotari agi atsüng.
Tesüiba ita asem tsüngda United Kingdom nung kiralongraba mapa ya tang agi tasembenbuba ataloker. Taküm March ita Westminster nung nisung 5 tepset aser hopta ana tejakdang Manchester nung bomb agi nisung 22 pokset.
Deobarnü British Prime Minister, Theresa May-i, “London nung kiralongrartemi amakyonga, June 8 General Election ji sentong yanglua aliba ama memelenshii dang agitsü” ta metetdaktsü.
Linük nung kiralongrartemi asemben tashi amakba ya tali bilemloka oa amangba Islamist indang tangatetba tamajung ajanga lir, ta May-i aitsü.
Tanü rongdak COBRA senden ka amenba sülen Downing Street kima nung Prime Minister-i “ozüng alema inyaksangshiba ajanga democratic maparen nung tetsükdaktsü maludaktsütsü” ta osangbenertem dang ashi.
“Joko ojang ta ashitsü mapang tongja tongogo. London Bridge aser Borough Market nung tai maket nisungtem tepsetba khukhua aitsür” ta laisa shisem.
Britain nung tawa kiralongra mapa inyakba ya Islamist extremism indang tangatetba tamajung ajanga lir. Iba tangatetba ya Islam mashileni angateta amangba ajanga lir aser ochi meyipsaba lir, ta British Prime minister-isa ashi.
“Kiralongraba ajanga kiralongraba rashia odaktsür aser iba ya tanü alima atema lendong tulu ka lir. Kiralongrartemi ajizüktepa ozüng alema mapa inyaker aser taochi kecha melii inyaksangshir. Asenoki iba anema inyaktsüla” ta laisa metetdaktsü.
Taküm March ita London nung Parliament amakba sülen UK nung security aser intelligence services ajanga kiralongratsü tasa pungu tashi nokdangtetogo, ta May-isa shisem.
British Prime Minister-i UK indang counter-terror ozüng meyipa reprangshitsü ta ashi aser temelenshi asübatem rongnung, Islamist tangatetba madak takok angutsüba atema counter-terrorism operation inyaktsü, kiralongratsü tasa atongtsü atema online nung kiralongrartem nem maongka magütsütsü, linük nung kiralongrar anema inyaktsü aser police nem tashi talila agütsüsemtsü lir, ta laisa shisem.
Iba lendong atalokba sülen yimten teloktei general election atema nüboyimba sentongtem magii thinenogo.
Tan agi tanabenbuba UK nung yimtenren teloktemi nüboyimba sentong anener asütsü. May 22 nü Manchester amakba sülen-a parnoki anogo asemnü atema nüboyimba sentongtem ajak anena liasü.