World Table Tennis C’ships Ding Ning-i kokogo

Dusseldorf, June 4 (Agencies): Deobarnü World No. 1 Ding Ning-i külem China nunger asayar third seed Zhu Yuling 4-2 agi koka World Table Tennis Championships tetsürtem kicha asaya asembuba kokogo.
Ding ya Rio Olympic champion lir aser pai mezüngbuba game 11-4 agi akok saka Zhu shiba tang mezüngbuba world championships final asayar lai game ana 11-9, 11-4 agi atonga koka 2-1 agi la tejakdang liasü.
Asayar anapronglai kanga junga asayatet saka Ding shibai 2011 aser 2015 nung world title koka ali lai 9-10 ta aliba game point ka save asü. Iba sülen lai point asem tashi atonga ngua score 2-2 aküm.
Zhu-i tang tashi nung 2015 China Open final nung dang Ding koka lir. Lai pezübuba game nung aibelen aika asü saka kasa mapang nung arishi küm 27 tain Ding-i kanga kümdanga asayaa 11-6 agi akok. Iba sülen tatembangbuba asaya 11-7 agi koka Ding-i iba title akok.
“World title asemben tashi koktetba ya kanga dang jangratemtsüka lir. Iba takok ya Chinese national team külemi longjemer inyakba ajanga lir,” ta lai ashi.
Ding ano la teammate Liu Shiwen den külemi tarep semifinal asayatsüba lir.
“Ni asüng tetsür tarep asaya nung junga asayatettsü imlar aser iba sülen anisüngzüktsü,” ta tarutsü indang asüngdang dang lai langzü.
China tsür asayar rongnungi world title asemben tashi akoker rongnung Ding tasembuba lir. Iba title ya Deng Yaping aser Wang Nan nati koka lir.