Nadal aser Wozniacki quarterfinal nung lir

Paris, June 04 (Agencies): French Open tokuben tashi koka alisang, Spain nunger tennis asayar Rafael Nadal iba tournament quarter-final tongogo aser tetsür kija asayaba nung Carolina Wozniacki-ia 2009 French Open champion, Svetlana Kuznetsova madak takok ngua tetsürtem quarter tongtetogo.
Roland Garros nung Nadal-i pa indang asayaba sempet tajung sayua kasa lisopur, Roberto Bautista Agut madak 6-1, 6-2, 6-2 agi takok ngua Roger Federer-i French Open quarter-final tiben tongtetba otsü den saku kümogo.
“Ni pelar, kechiyong Roberto ya asayar tajung ka lir. Quarter-final nung ano khen asayatsü maongka anguba ya kanga tongtibang lir,” ta Honibarnü arishi küm 31 ajungsang, Nadal-i ashi.
Taoba küm French Open koka alisang, Novak Djokovic-a Deobar aonung Spain nunger Albert Ramos-Vinolas madak takok ngura kasa asayamong nung quarter-i 11ben buba atur asütsü.
Japan nunger Kei Nishikori-a South Korea nunger Hyeon Chung den set pongu tashi asayar last 16 tongtetogo.
World No. 8, Nishikori aser Chung na tsüngda asayaba nung Nishikori-i World No. 67, Chung madak 7-5, 6-4, 6-7 (4/7), 0-6 aser 6-4 agi akok.
Roland Garros tasembuba round nung Asia nungi asayar ana ajurutepba ya ibai mezüngbuba lir aser 2014 US Open final asayasang, Nishikori-i quarter-final nung Fernando Verdasco den asayatsü.
Russia nunger Karen Khachanov aser Andy Murray-na pezübuba round asayatsü lir. Karen-i America nunger John Isner madak 7-6 (7/1), 6-3, 6-7 (5/7), 7-6 (7/3) agi koka liasü.
2017 French Open tetsürtem tennis kija asaya nung Wozniacki mezüngbuba quarter-final tongtetogo. Lai Kuznetsova madak 6-1, 4-6, 6-2 agi takok angu.
Wozniacki ya quarter-final nung Australia tsür Samantha Stosur mesüra Latvia tsür Jelena Ostapenko den asayatsü.
Kasa asayamong nung Karolina Pliskova-i Germany tsür Carina Witthoeft madak 7-5, 6-1 agi kokteta round pezübuba tongtetogo.
Pliskova-i quarter-final nung Paraguay tsür Veronica Capede Royg den asayatsü.
World No. 290, Petra Martic-i Latevia tsür Anastasija Sevastova madak 6-1, 6-1 agi koka last 16 tongtetogo.
Tanga asaya ka nung taoba küm tetsürtem French Open marok bena alila, Muguruza-a tsükogo. Spain tsür, Garbine Muguruza ya Kristina Mladenovic-i 6-1, 3-6, aser 6-3 agi tsükdaktsü.
Arishi küm 24 tain, Mladenovic ya last eight nung Venus Williams mesüra Timea Bacsinzky den asayatsü.