Thailand Open Grand Prix B. Sai Praneeth-i kokogo

Bangkok, June 4 (Agencies): Deobarnü Thailand Open Grand Prix badminton championships nung India nunger asayar B. Sai Praneeth-i takok nguogo.
Praneeth-i final asaya nung Indonesia nunger Jonatan Christie 17-21, 21-18, 21-19 agi akok.
Iba asaya ya ghonda kaser minute 11 agia asaya. Asaya nung Praneeth-i mezüngbuba set makok aser iba sülen tanabuba aser tasembuba set koka pai iba asaya akok. Iba takok ya pa asoshi 2017 nung tanabuba takok asütsü.
Semi final asaya nung pai Thailand nunger asayar Pannawit Thongnuam 21-11, 21-15 agi ayong ayonga koka liasü.
Pa ya India nunger rongnungi Super Series title akoker pezübuba dang lir aser pai iba jenjang Singapore Super Series akokdang ajangteta liasü. Syed Modi International Grand Prix final asaya nung pa Sameer Verma-i tsükdaktsü.
Taoba ita Singapore Open asayamong nung pai külem India nunger asayar Kidambi Srikanth koka pa asoshi mezüngbuba Super Series title nguteta liasü. Pai 17-21, 21-17, 21-12 agi Srikanth madak takok angu.
Kasa mapang nung PM Narendra Modi-i B Sai Praneeth nem Thailand Open akokba atema tenüngsang agütsü.
“Thailand Open badminton tournament akokba atema B Sai Praneeth nem tenüngsang agütsür. Nü takok ajanga India nunger ajak pelar aser nema danga bilemer: PM @narendramodi,” ta PM official handle-i tweed asü.