Paris accord ajanga India den US tesendaktep meraksatsü: US

Kolkata, June 05 (Agencies): US Tir, Donald Trump-i Paris climate tezüngzüktep nungi pilaba ajanga US-India tesendaktep meraksatsü, kechiyong linük anati tejakleni aotsü atema lenmangtem bushitsü, ta tanü Kolkata nung US nungi ketdangser kati ashi.
West Bengal yimtiba nung osangbener den jembidang US Consul General Craig L. Hall-i, “Tangbo US-India tesendaktep kanga ulua tarokba kümdar. Medemer rongnunga mangatettep adoker, anungji ibaji taoksatsü osang ka masü. Onoki tangatetba balala atema inyaktsü aser tejakleni aotsü. US-India tesendaktep nung ibaji tangatetba tajung ka lir,” ta ashi.
Brihostibarnü US Tir, Donald Trump-i US linüki climate Change indang Paris agreement nungi pilaba osang sangdonga liasü.
Iba onük nungsa US Tir, Trump-i India aser China nata anema jembia liasü.
US telemtetba ajanga India-US tesendaktep kongshitsü asü? ta asüngdangba langzüdang Hall-i, “Yamaji masütsü ta ni bilemer. Iba (US-India) ya tesendaktep tulu ka lir aser tang onok tangatetba balala süaka, maneni amalitepa alir aser maneni jembidar,” ta ashi.
“Onük aika nung onok (India-US) tangatetba kasa lir, anungji onük ka nung tangatetba balala asübajibo kecha masü. Onok kibong ka ama aser medemer ama lir. Iba atemaji onoki inyaktsü. Onoki iba onük atema jembitsü aser maneni tejakleni aotsü,” ta ashi.
Alima tzü-mopung melenshiba nokdangtsü atema linük aikati longjemer carbon emissions nokdangtsü atema tezüngzüktep agiogo, ajisüaka US-ibo iba tezüngzüktep nungi pilaogo.