Harsh Vardhan Shringla-i train lenmang ka yanglutsü asoshi benok

Agartala, Jun 4 (Agencies): Dhaka nung India nunger High Commissioner Harsh Vardhan Shringla-i Tripura sorkar dang tang Agartala – Akhaura train lenmang mesüka South Tripura nung Belonia tesem ajanga Tripura aser Bangladesh na sendakteptsü asoshi train lenmang ka yanglutsü atema achaayangtsü asüngdang. Yashi nikongtsütsü Agartala semdangba mapang Shringla-i Chief Minister Manik Sarkar den ajurutepa liasü aser Tripura aser Bangladesh na tsüngda shishilembaba aser terenlok maparen balala dak sendakba jembishinütsü atema Chief Secretary Sanjeev Ranjan aser tongtibang ketdangsertem den senden ka aka.
Shringla-i osangbenertem dang ashiba agi, Tripura aser Bangladesh na tsüngda tesendaktep akangshitsü asoshi Feni ayong nung apu yanglutsüba, Agartala- Akhaura Rail project aser Bangladesh nung Ashuganj dena tanga port tem nung temelaba agütsütsü asoshi tebilemba ken o tem Chief Minister den jembishinüa liasü. “India aser Bangladesh na tesendaktep temaba jenjang tongogo aser iba ajanga linük anaprongla tejakleni aoba nung yarir. Ajisüaka Belonia ajanga Bangladesh den sendakteptsü asoshi train lenmang yanglura iba ajanga nüburtem tali sendakteptettsü aser shishilembaba tsütsü tali renloktsü,” ta Shringla-i ashi. Pa yashi Akhaura Check Post ajanga aru aser tanü Bangladesh-i meyipa ogo.
Linük ana tsüngda tesendaktep tajungba küma yanglushitsüba ken o jembidang state sorkar ketdangsertemi ashiba agi, sentongtem ajak ataloka ora Tripura aser Chittagong na sendakteptsü asoshi Sabroom tesem nung Feni apu Indian external affairs ministry-i teyari agüja taruba ita nungi yanglu tenzüktsü. Iba apu yanglutsü asoshi Ahmadabad nung amenoker aliba construction company ka nem nongloktsüogo. Iba apu aser iba den sendaktepa lenmang yanglutsü asoshi ita 30 shi agitsü, ta ketdangsertemi ashi.