WED nung DMC-i dustbins alem

Dimapur, June 5 (TYO): World Environment Day den külemi aser ano Swachh Bharat Mission kübok linük nung dry & wet waste bendangba maparen nung shilem ka ama Dimapur Municipal Council (DMC)-i Hombarnü angati dustbins alemba sentong ka agi.
Iba sentong ya DMC office complex nung ayongzüka agi aser Dimapur kübok colony/council ketdangser nem dustbins lema agütsü.
Sentong nung Swachh Bharat District Ambassador, Geoffrey Yaden-i o jembidang, asenoki asen temeket merüka ayutsü atema tebilemtsü khuret abentsüla aser tangar-a ajungmesotsüla ta ashi.
Swachh Bharat Mission alizüng tongtettsü atema lokti nung lennirtemi iba mapatong nung dener shilem agitsüla, ta paisa ayongzük.
Brand ambassador ka ama onoki lokti lennirtem den külemi inyaktsüla aser Swachh Bharat Mission kübok Dimapur nung metsümeshidak 400 yanglutsü sentong lir. Anungji, iba dak sendakba nung nisung ajaki SBM den amalitepa yariteptsü mepishir, ta Geoffrey Yaden-isa shisem.
Sentong nung DMC, CEO, Moa Sangtam-i yokba osang Dr. Sentimoa, Vas, DMC-i zünga metetdaktsü.
Swachh Bharat Mission indang alizüngji asen yimti merükmejua ayutsüba lir aser ibaji mapang tatsüka lir solid waste management maparen inyakba ajanga inyaktettsü, ta Moa Sangtam-i ashi.
DMC-i bendanglen nungi bener aruba technology amshia recycle plant ka yanglutsü aser ibaji ajanga jana recycle asütsü saka tzümopung memenentsü. Iba mapatong ya nübortemi yaritep nungdang takok angutsü anungji ajaki DMC den yariteptsü aser colony tem nung waste management indang osang prokshitsü ayongzüker, ta DMC CEO-i shisem.
Tanü sentong nung kiyong balala nungi ketdangser nem dustbin bundle teranana (12) lema agütsü. Tanü inyakba mapaji mezüngbuba shilem lir aser bundle ka nung dustbin 72 lir aser itemji pei pei kiyong nung alemtsü.
DMC-isa colony/council züngsemtem dang tekaratiba nung pei pei kiyong nung kilen aliba osang agütsütsü metetdaktsü.
Iba sentong nung DUCCF, DDCF, GB Union Dimapur nungi lennirtem aser taoba DMC züngsem Hokto-ia o jembi. Tatem nung SBM Nodal Officer, B. Bhadra-i anküp tepela o jembi.