Saudi Arabia-i Qatar Airways indang tayimtsü kata meyoki anenja lir

Doha, June 05 (Agencies): Saudi Arabia-i Hombarnü 1159 GMT ako tashi Qatar Airways indang tayimtsü kata meyoktsü, ta osang ka sangdongogo.
Aser iba tenokdangba agütsüba mapang ya atsülangtsü asü masüar anu tejangja memetet, ta Qatar Airways indang odongtar-i ashi.
Saudi Arabia den tesendaktep aliba akangshitsü asoshi US tir, Donald Trump iba linük semdanger ita ka sülen Hombarnü, Gulf state temi Qatar den tesendaktep aliba raksa aser mitkar telongjem nungi Qatar ya meindok.
Qatar indang kidanger linüktem rongnung Saudi Arabia, Bahrain, United Arab Emirates aser Egypt linüktemi Qatar den tesendaktep salar, ta sangdonga lir.
Kiralongrar aser tashiyim mapa inyakba nungi kümzüktsü mechi Qatar den tesendaktep malitsü aser ali, tzü aser tayimtsü tesendaktep ajunga shibangtsü, ta Saudi ketdanger-i osang sangdonga lir.
Middle-east nung US mitkar indang tayimtsütem anenba tesem tulutiba ya Qatar nung lir aser iba ajanga Islamic State telok, jihadists anema raratsü asoshi tongtipang tesem ka akümer.