London amaker rongnung Pakistan nunger ka dena liasü

London, June 05 (Agencies): Taoba Honibar aonung kiralongrar asemi gari ka hire sür London Bridge nung tetsüng agi jajartem dak atsükba sülen Borough Market nunga nisung dak atsük, iba sülen parnoki nisung aika dak kotari agi tsünga liasü, aser par asem rongnung kabo Pakistan nungi Jihadist züngsem ka liasü.
Iba amakba nung nisung tenet asü aser nisung 48 mozükidangi anir ao.
Metropolitan Police-i ashiba agi, nisung ka tenüng agi Abz bo Pakistan nungi “jihadi” züngsem ka liasü.
Osang ajanga ashiba agi, arishi küm 27 tain, Abz ya tamalen London Tube worker ka liasü aser Channel 4 TV documentary “The Jihadis Next Door” nunga shilem agiogo.
Honibarnü London Bridge aser Borough Market amaker rongnung tongtiji pa liasü, ta police-i jangjaogo.
Iba mapang nungji Abz-i Arsenal strip tola ka semer liasü, ta kasa osang ajanga ashi.
Abz maitsüji taoba mapang par medemer kati jangjatsü. Iba nisungba jagi police dang Abz indang nija osangtem metetdaktsü.
Tanur ana tebu, Abz-i YouTube video tem reprangba ajanga kiralongratsü atema pa ajungmesoa liasü, ta iba nisungba jagi police dang ashi.
Pai-sa ashiba agi, Abz-i America nunger sempaba indang sayutsüngir, Ahmad Musa Jibril indang video tem YouTube nung repranga liasü.
Ano Abz’er kiyonger ka tenüng agi, Erica Gasparri-i, “Pai ozü tanurtem kiralongratsü atema ajungshi, pai Park nung tanurtem dang Islam yimsü indang ashi. Ano Ramadan mapang nung pa kidangi arua tanurtem nem sen aser nanglongsa agütsü,” ta ashi.
Lai-sa ashiba agi, “Pai kü dang, ‘Allah tenüng nungbo pai ajak inyaktsü, aser kütsü-a tepsettsü melunga lir’ ta ashi.”
Honibar aonung tatalokba dak sendakba nung police-i nisung 8 pua lir.