Malaysia nung Islamic Party-i anemba sülen Jerusalem sentong athir

Jakarta, June 5 (Agencies): Malaysia nung Khristan telok kati Jerusalem longjemshiba jubilee sentong ka agitsüba liasü saka Islamic party kati anema nokdakba ajanga sentongji athi.
Islamic party jagi sorkar dang sentong magidaktsütsü takhangba agütsü aser ibaji meinyakra, anema lungkak aittsü ta parnoki amokmeren.
“Jerusalem indang Jubilee den külemi Nations of the Golden Gate sentongji Melaka yimti nung June 15 nungi 18 tashi agitsüba liasü. Iba ya ‘Zionist Christianity’ aser Yihuda nunger sobaliba ajungkettsü atema lir” ta Pan-Malaysian Islamic Party (PAS)-i ashi.
“Israel-i tashiyim mapa inyakba ajanga Muslim nungertem timtemba onok temulung nung lir. Tang parnoki Malaysia litsü nung Jerusalem indang jubilee amungtsü ayongzüker aser ibaji Muslim nunger anema lir” ta PAS communication officer Nasrudin Hassan-i Facebook nung metetdaktsü.
“Yihuda nunger sobalibaji asen linük nung tera meyangdaktsütsüla. Sorkari iba sentong anema mapa inyaktsüla. Muslim nunger temulung meyirudaktsütsüla. Zionist Christian maparen ajanga Malay litsü menenmechi mesüdaktsütsü” ta paisa ashi.
Parnoki ayongzüba sentong anema police tsüngdang ken o 32 benokba agi sentong thiogo ta All Malaysian-Golden Gate Nation Revival Convocation-i metetdaktsü.
Malaysia nung Khristantemji nütsüng yongsük nung shilem 10 shi lir aser parnoki amangtsü atema telatetba kar lir. Zionism nung amendak Judaism aser Israel pusembaji Malaysia linük nung memelar.
“Malaysia nung Khristantemji taremzük, tangar atema bilemtsür aser tangatetertem dang lir aser onoki linük ka nung putepa aliba meraksatsütsü” ta Christ Church bishop Jason Selvaraj-i ashi.