Kerala nung World Environment Day tenüng nung süngtong crore ka atem

Thiruvananthapuram, June 05 (Agencies): Hombarnü alima ajunga nung World Environment Day amongba den külemi Kerala nunga mongogo, aser iba sentong nung state sorkari anir süngtong tila crore ka lemshia state tesem balala nung temdaktsü.
World Environment Day osang sangdongba nung Kerala Chief Minister, Pinarayi Vijayan-i nüburtem aser lokti ajunga dang sorkari süngtong atemtsü sentong yangluba nung yaritsü ajungshi.
Forest Department-i süngtong tila lakh 72, Agriculture Department-i parnok indang nursery tem nungi süngtong tila lakh 5 agütsü. Tanüngba süngtong tila lakh 23 ya Kudumbashree densema agency balala nungi agütsü, ta sorkar osang ka ajanga ashi.
Iba sentong nung sorkari mozü aliba aser süngjanglijang adangba süngtong tem timba agütsü. Acacia aser eucalyptus süngtongtem ajanga ali telung nung aliba tzü kanga ajemba ajanga iba süngtong matemtsü sorkari lemtet.
Iba sentong nung Kerala Angh, P Sathasivam-i Raj Bhavan nung shilem agia süngtong atem aser Malayalam actor, Mohanlal-ia college nung oa süngtong atemba sentong nung shilem agi.
Kerala ya tourist temi kanga sabuba state ka lir aser iba state nung ya tetsür tebur bendanga mamshir aser tzü mopung den apet mapatem kanga bolua inyaker.