Arishi küm 51 nung stunt balala aitsü ya temela masü: Salman

Mumbai, June 5 (Agencies): Salman Khan tang action film Tiger Zinda Hai nung shilem tagidak lir aser iba sülen Remo D’Souza indang dance movie ka nung shilem agitsü asoshi sentong lir, ajisüaka Salman-i ashiba agi, arishi küm 51 nung film nung stunt balala nung shilem agitsü ya pa atema temela masü.
Taoba mapang melangtepba film Sultan nung shilem agiba ajanga pa temang nung timtem agütsü, ta Salman-i ashi iba den pai asayamenü meyong süa Ali Abbas Zafar-i direct asüba spy-action movie nung shilem agitsü asoshi nangzükba ya tamashi mapa ka lir, ta ashi.
“Sultan film tangokba sülen kü temang nung ngoya ngoshi aika liasü aser tang tamachi ama ‘Tiger Zinda Hai’ nung shilem agitsü asoshi tenzüker. Film nung asemtsüba mesüra ki ka nungi ki ka pongdangtsüba amala stunt balala aika nung shilem agi aser ni matu kümdar. Künübo kü temokok ya pokteta adoktsü amai ni bilemer. Iba film tangokzüker külen ni Remo D’Souza indang ‘dancing film’ ka nung shilem agitsüba lir. Mezüngbo ni iba film nung tsüngsangba shilem kar alitsü aser idakji shilem agitsü ta dang bilem saka tanü asüng tsüngsang nung ‘acrobatics’ aser ‘gymnastics’ amala lir ta ni yimdangi marui liasü,” ta pai ashi.
Mapang tatsüka tejakdang iba film title ya ABCD 3 asütsü ta osang ka sangdonga liasü saka iba osang ya tai ta pai shiogo. “Ni ABCD 3 film nung shilem magir, ibaji Disney meyong. Dance film ajakbo ABCD masü,” ta Salman-isa ashi.
Kabir Khan-i direct asüba film Tubelight nunga Salman-i shilem agiba angutsü. Iba film ya tena külemi shilem agiba tasembuba film lir. Taoba mapang nung tena Ek Tha Tiger aser Bajrangi Bhaijaan nung külemi shilem agia liasü.
“Kabir den film asem nung külemi inyakba sülen küna kanga junga angateteper. Küna kanga ayonga inyaker, saka pai kü nem shilem agidaktsüba film ajak nung shilem agitsü ta mali. Pai kü nem shilem agidaktsünüba film kar ni temolung mesera ni meinyaktsü, kasaji pai shilem ka ni asoshi mapet ta bilemra kü nem iba shilem magütsütsü,” ta paisa maneni shisem.
Iba film nung Sohail Khan, Om Puri aser Chinese actress Zhu Zhu nungeri tongti shilem agir aser Tubelight film ya June 23 nü sayatsü. Film nung maneni Katrina Kaif-i tongti shilem agitsü.