GST ajemtsü asoshi cellular operator temi Finance Ministry dang mepeshir

New Delhi, June 06 (Agencies): Telecom company balala ajanga tentetba telok-i sorkar dang parnok company dang Goods and Service Tax (GST) shilem 18 meshiba ya ajemtsü asoshi temepeshiba shidi ka züluogo.
Iba telok, Cellular Operators Association of India (COAI) ajanga züluba shidi nung parnok senotsü agi tim atemba shia lir.
“…telecom industry ya senotsü agi kanga tim atemba mapang ka lir, anungji iba GST rate ya tajemba kümdaktsütsüla aser iba ajanga tang aliba khuret tali mükemdaktsütsü,” ta COAI ajanga Revenue Secretary dangi züluba shidi nung shia lir.
GST Council ya June 11 nung senden ka mener, chiyongtsü aser oset tabu balala nung parnoki tax meshitsü jenjang ateter sangdonga aliba nung tashishitsü mesüra tereprangshitsü alibatem reprangshiyimtsü aliba mapang matongdang iba shidi ya zülu.
Tawa GST tasen yangluba nung tang agia aliba tax dang nungi jenjang temaba-i ajungketja alirtem indang tebilemba tem reprangshitsü, ta Finance Ministry ajanga tetuyuba agüja lir.
“Telecom nung tax shilem asem aki tali kümdaktsüba ajanga revenue tali kümdaktsütsü aser company dangi sen aitba nung ajemdaker tarutsü atema sentong yangluba nung tetsükdaktsü alutsü,” ta COAI indang shidi nung shia lir.
Iba yongji tajangzüng kanga ajema angutsü, ta iba shidi nungsa shia lir.
COAI nung ya Bharti Airtel, Vodafone, Idea Cellular aser Reliance Jio amala company ya züngsem lir aser parnoki ashiba agi, telecom ajanga amshiba diesel aser electricity bo GST nung mali aser iba ajanga tajangzük balaka magütsür.
“Iba GST indang tax ajanga telecom sector ya kanga kangshitsü,” ta parnokisa shisem.
GST Council ajanga telecom service nungi tax shilem 18 agitsü lemteta lir. Tang telecom service nung sorkar ajanga tax shilem 15 agir aser itemji phone bill nungi agizüker.