Nashi tepsetba aser shibelenba atema NSA & Gangsters Act kübok aitsütsü

Lucknow, June 6 (Agencies): Nashi tepsetba aser mamatzü atema metsüba shirurutem ozüng alema shibelenertem National Security Act aser Gangsters Act kübok tai tongloktsütsü, ta Uttar Pradesh police-i tanü metetdaktsü.
Iba tetuyuba ya UP Director General of Police, Sulkhan Singh-i district ajak nung police tanishirtem dangi yokogo.
Taoba Akhilesh Yadav’er sorkar mapang nashi tepsetba aser mamatzü atema metsüba shirurutem shibelenba nokdangtsü atema tetuyuba agütsü saka ibaji mapa küma meinyak.
“Nashi tepseter aser mamatzü atema metsüba shirurutem shibelenertem NSA aser Gangsters Act kübok ken o benoktsü” ta DGP-i metetdaktsü.
NSA kübok sorkari nisung ka tepuokdak kobi ka yunüdir ayutsü aser ketdangsertemi kechi atema apu’ar osang memetetdaktsütsü koka lir.
Gangsters Act kübok ken o benokertemji police record nung züluoka aliba telok ka nung züngsem ka akümer. Iba ajanga police-i tai tonglokja aliba nisung mita repranger aser parnok anema ken o tasen mebenokyonga, asüngdangyatsü atema local police station-i jaoktsü akok.
DGP-isa district ajak nung Senior Superintendent of Police (SSP) aser Superintendent of Police (SP) dang nashi kümzükba, tebur tetsür medemba azüokba, tamangba yimsü melenba anema nokdakertem aser mamatzü atema metsüba shirurutem shibelenba nokdangba tenüng amer ozüng alema mapa inyakertem azüoktsü atema tetuyuba agütsüogo.
UP nung ‘gau rakshaks’ mesüra iba mesükba teloktemi nashi tepseter ta asüba tesemtem nung adenshiba ajanga traffic jam adoktsüba, nisungtem züka merenshiba aser loktii ozüng alema mapa inyakba tatalokbatem ajuruba sülen DGP-i iba tetuyuba agütsü.